Uger-uger nyurat Tanda baca aksara Bali

Tanda baca dalam aksara bali

1. Carik Siki ᭞

Carik siki kaanggen nyurat satua, kanda, geguritan, kidung, miwah kekawin sane nyihnayang apalet, miwah kanggen pengangsel kruna utawi lengkara

adi kema, mai anake cening.

ᬳᬤᬶᬓᭂᬫ᭞​ᬫᬳᬶᬳᬦᬓᬾᬘᭂᬦᬶᬂ᭟

Carik siki taler kanggen nyurat angka miwah aksara ancang (ringkesan)

2020 --- ᭞᭒᭐᭒᭐᭞​

Balita --- ᭞​ᬩᬮᬶᬢ᭞​

BRI --- ᭞​ᬩᬾ ᬏᬃ ᬇ᭞​

Ring tengahing lengkara masusun, kangge malasang lengkara pepadan kapertema miwah lengkara selanturnyane maduluran kruna sakewanten, sakewala, miwah sane tiosan.

i meme suba teka sakewala i bapa konden masih pragat ngae tugas.

ᬳᬶᬫᬾᬫᬾᬲᬸᬩᬢᭂᬓ᭞ᬲᬓᬾᬯᬮᬳᬶᬩᬧᬓᭀᬦ᭄ᬤᬾᬦ᭄ᬫᬲᬶᬄ ᬧ᭄ᬭᬕᬢ᭄ᬗᬳᬾᬢᬸᬕᬲ᭄᭟​

Ring tengahing lengkara masusun, yening lengkara utama magenah pungkuran.

yening beli payu mlali mai tiang buung mlali ke mall.

ᬬᬾᬦᬶᬂᬩᭂᬮᬶᬧᬬᬸᬫ᭄ᬮᬮᬶᬫᬳᬶ᭞​ ᬢᬶᬬᬂᬩᬸᬯᬸᬂᬫ᭄ᬮᬮᬶᬓᭂᬫᭀᬮ᭄᭟​

Ring pungkur kruna pakeengan sakadi ohh, beh, yeh, mih, dewa ratu, miwah sane lianan.

mih, keweh sajan puk ulangn aksara baline.

ᬫᬶᬄ᭞​ᬓᬾᬯᭂᬄᬲᬚᬦ᭄ᬧᬸᬓ᭄ᬳᬸᬮᬗᬦ᭄ᬅᬓ᭄ᬱᬭᬩᬮᬶᬦᬾ᭟​

2. Carik Kalih ᭟

Carik pareren kasurat ring panelasang kruna miwah lengkara.

I bapa luas ke peken.

ᬳᬶᬩᬧᬮᬸᬯᬲ᭄ᬓᭂᬧᭂᬓᭂᬦ᭄᭟​

jaman jani jaman mula aneh, sing tawang timpal sing tawang musuh.

ᬚᬫᬦ᭄ᬚᬦᬶᬚᬫᬦ᭄ᬫᬸᬮᬳᬦᬾᬄ᭞​ᬲᬶᬂᬢᬯᬂᬢᬶᬫ᭄ᬧᬮ᭄ᬲᬶᬂᬢᬯᬂᬫᬸᬲᬸᬄ᭟​

3. Pasalinan ᭟᭐᭟

Pasalinan kanggen ring panelasang nyurat surat, satua miwah kanda. Ring wangun geguritan kanggen cihna pangentos pupuh.

....... sarahina nyantosang ulung i bulan baru.

....... ᬲᬭᬳᬶᬦᬜᬦ᭄ᬢᭀᬲᬂᬳᬸᬮᬸᬂᬳᬶᬩᬸᬮᬦ᭄ᬩᬭᬸ᭟​᭐᭟​

....... ningeh munyi patikacuh, andeang kadi matogtog, pipis telah lima daki. Puh Maskumambang. Inggih beli, jengah titiang kapirengin, beli maselselan, nyelsel raga sai sedih, ngiring beli lan matinggal.

....... ᬦᬶᬗᭂᬄᬫᬸᬜᬶᬧᬢᬶᬓᬘᬸᬄ᭞​ᬳᬦ᭄ᬤᬾᬳᬂᬓᬤᬶᬫᬢᭀᬕ᭄ᬢᭀᬕ᭄᭞​ᬧᬶᬧᬶᬲ᭄ᬢᭂᬮᬄᬮᬶᬫᬤᬓᬶ᭟​ᬧᬸᬄᬫᬲ᭄ᬓᬸᬫᬫ᭄ᬩᬂ᭟​ᬳᬶᬗ᭄ᬕᬶᬄᬩᭂᬮᬶ᭞​ᬚᭂᬗᬄᬢᬶᬢ᭄ᬬᬂᬓᬧᬶᬋᬗᬶᬦ᭄᭞​ᬩᭂᬮᬶᬫᬲᭂᬮ᭄ᬲᭂᬮᬦ᭄᭞​ᬜᭂᬮ᭄ᬲᭂᬮ᭄ᬭᬕᬲᬳᬶᬲᭂᬤᬶᬄ᭞​ᬗᬶᬭᬶᬂᬩᭂᬮᬶᬮᬦ᭄ᬫᬢᬶᬗ᭄ᬕᬮ᭄᭟​᭐᭟​

4. Panten / Panti ᭚

Panten utawi panti kaanggen ngawitin nyurat satua, kanda miwah geguritan.

Karmapala

Kacrita sang Panca Pandawa makadi sang Dharmawangsa, sampun tutug suenidane nyeneng ratu, ...

᭚ ᬓᬃᬫᬨᬮ

ᬓᬘ᭄ᬭᬶᬢᬲᬂᬧᬜ᭄ᬘᬧᬵᬡ᭄ᬟᬯᬫᬓᬵᬤᬷᬲᬂᬟᬃᬫᬯᬗ᭄ᬰ᭞​ᬲᬵᬫ᭄ᬧᬸᬦ᭄ᬢᬸᬢᬸᬕ᭄ᬲᬸᬯᬾᬦᬶᬤᬦᬾᬜᭂᬦᭂᬂᬭᬢᬹ᭞​---

5. Pemada ᭛

Pemada kanggen nyurat kekawin miwah Parwa. Pamada puniki mawit sangkaning ᬫ =    ᭞ᬗ᭞ ᬚ     =   ᭞ᬧ᭞  dados ᬫᬗᬚᬧ sane mateges nunas ica mangda rahajeng. Pemada ring pungkur kekawin sane apada. Yening kasurat ring pengawit kekawin taler kewastanin panti, upami:

Awighnamastu. Prathamassarggah. Sronca. Hana sira ratu dibya rengon, prasasta ring rat musuh nira pranata, jaya pandhita ring aji kabeh, Sang Dasaratha nama ta moli.

᭛ᬅᬯᬶᬖ᭄ᬦᬫᬲ᭄ᬢᬸ᭛ᬧ᭄ᬭᬣᬫᬰ᭄ᬰᬃᬕ᭄ᬕᬄ᭟ᬲ᭄ᬭᭀᬜ᭄ᬘ᭟

ᬳᬦᬲᬶᬭᬭᬢᬹᬤᬶᬩ᭄ᬬᬋᬗᭀᬦ᭄᭞ᬧ᭄ᬭᬰᬵᬲ᭄ᬢᬭᬶᬂᬭᬵᬢ᭄‌ᬫᬸᬲᬸᬄᬦᬶᬭᬧ᭄ᬭᬡᬢ᭞ᬚᬬᬧᬡ᭄ᬥᬶᬢᬭᬶᬗᬚᬶᬓᬩᬾᬄ᭞ᬲᬂᬤᬰᬭᬣᬦᬵᬫᬢᬵᬫᭀᬮᬷ᭛

6. Carik Agung / Peslinn ᭛᭐᭛

Carik agung utawi pesalinan kanggen sajeroning pamuput kekawin miwah taler kanggen ri kala ngentosin wirama, upami:

Kusuma surabhi ya padhanira manulari wangi suyasa satata suci marum.

ᬓᬸᬲᬸᬫᬲᬸᬭᬥᬤᬶᬬᬧᬥᬦᬶᬭᬫᬫᬸᬮᬭᬶᬯᬗᬶᬲᬸᬬᬲᬲᬢᬢᬰᬸᬘᬶᬫᬭᬹᬫ᭄ ᭛᭐᭛

7. Carik Pamungkah ᭝

Carik pamungkah kanggen nyihnayang nuturang makeh miwah tetenger bebaos rauhing sane baosanga.

Pak Tut matakon, "Kenken carane ngae blog sekadi puniki cening?"

ᬧᬓ᭄ᬢᬸᬢ᭄‌ᬫᬢᬓᭀᬦ᭄᭝ᬓᬾᬦ᭄ᬓᬾᬦ᭄ᬘᬭᬦᬾᬗᬳᬾᬩ᭄ᬮᭀᬕ᭄‌ᬲᬓᬤᬶᬧᬸᬦᬶᬓᬶᬘᭂᬦᬶᬂ᭟

Gandhi masaut, "gampang to Pak Tut, cenik gaene to!"

ᬕᬦ᭄ᬥᬶᬫᬲᬳᬸᬢ᭄᭝ᬕᬫ᭄ᬧᬂᬢᭀᬧᬓ᭄ᬢᬸᬢ᭄᭞ᬘᭂᬦᬶᬓ᭄ᬕᬳᬾᬦᬾᬢᭀ᭟

8. Idem "

Idem kanggen nerangan yening pateh sesuratan utawi suaranyane sareng ring sane ba duuran, upami:

Deterjen sane wenten ring toko gandhis:

Deterjen sakura

Deterjen snapy

Deterjen lemon

Deterjen ocean

ᬤᬾᬢᭂᬃᬚᬾᬦ᭄ᬲᬦᬾᬯᬾᬦ᭄ᬢᭂᬦ᭄ᬭᬶᬂᬢᭀᬓᭀᬕᬦ᭄ᬥᬶᬲ᭄᭝

ᬤᬾᬢᭂᬃᬚᬾᬦ᭄‌ᬲᬓᬸᬭ᭟

         "       ᬲ᭄ᬦᬧᬶ᭟

    "     ᬮᬾᬫᭀᬦ᭄᭟

    "  ᬳᭀᬘ᭄ᬬᬾᬦ᭄᭟

Pakeling**

1. Sejeroning nglimbakang kawigunan aksara Bali, iriki taler kamanggehang ceciren pepaosan sakadi:

tanda seru --- !

tanda pitaken --- ?

tanda petik --- "

sama dengan --- =

Ceciren pepaosan sekadi puniki kanggen rikala ngawirin peplajahan bB ring sekolah.

2. Tatacara nyurat saluiring lengkara patut nganggen pasang jajar sambung. Pasang jajar palas wantah kanggen ri kala ngawitin peplajahan basa Bali ring Sekolah Dasar.

Upami:

Umahne malakar aji kayu seseh.

liu anake jani luas mancing ka tukade.

Pasang jajar sambung

ᬳᬸᬫᬳ᭄ᬦᬾᬫᬮᬓᬃᬳᬚᬶᬓᬬᬸᬲᬾᬲᬾᬄ᭟

ᬮᬶᬬᬸᬳᬦᬓᬾᬚᬦᬶᬮᬸᬯᬲ᭄ᬫᬜ᭄ᬘᬶᬂᬓᬢᬸᬓᬤᬾ᭟

Pasang jajar palas

ᬳᬸᬫᬳ᭄ᬦᬾ  ᬫᬮᬓᬃ   ᬳᬚᬶ   ᬓᬬᬸ   ᬲᬾᬲᬾᬄ᭟

ᬮᬶᬬᬸ  ᬳᬦᬓᬾ  ᬚᬦᬶ  ᬮᬸᬯᬲ᭄ᬫᬜ᭄ᬘᬶᬂ  ᬓ   ᬢᬸᬓᬤᬾ᭟